vo jo har-vaqt sochta hai mujhe
ḳhud se bichhḌa hua mila hai mujhe
ek aahaT si aati rahti hai
koi to hai jo DhunDhta hai mujhe
apna aghaz ho na ho lekin
apne anjam ka pata hai mujhe
gahre paani ki or baḌhte hi
ḳhud-ba-ḳhud dariya rokta hai mujhe
hal-e-dil jab sunana chaha to
us ne hans ke kaha pata hai mujhe
ḳhud par aḳhir ghurur kyuun na karun
us ke har ḳhvab ne chuna hai mujhe
asman se utar ke chand ‘saba’
de ke thapki sula raha hai mujhe
Leave a Reply