Kisi Tarah Bhi Jo Is Reg-Zar-E-Hasti Par

kisī tarah bhī jo is reg-zār-e-hastī par

ubhar sakā jo na puurā vo naqsh-e-pā huuñ maiñ

jo har taraf se havāoñ kī Thokareñ khaa.e

dar-e-qubūl kī rad-karda vo duā huuñ maiñ

na hausloñ meñ tamavvuj na valvaloñ meñ ḳharosh

isī kā naam hai jiinā to jī rahā huuñ maiñ

vafā pe tanz hai āvārgī-e-shauq nahīñ

har āstāñ pe jo sajde bikhertā huuñ maiñ

badal sakī jise ab tak na be-ruḳhī terī

vahī vafā kā satāyā huā ‘razā’ huuñ maiñ

Leave a Comment