Bacha Gar Naz Se To Usko Phir Andaz Se Mara

bacha gar naaz se to us ko phir andaz se maara

koi andaz se maara to koi naaz se maara

kisi ko garmi-e-taqrir se apni laga rakkha

kisi ko munh chhupa kar narmi-e-avaz se maara

hamara murgh-e-dil chhoda na akhir us shikari ne

gahe shahin phenke us pe gaahe baaz se maara

ghazal padhte hi meri ye mughanni ki hui halat

ki us ne saaz maara sar se aur sar saaz se maara

nikali rasm-e-tegh-o-tasht dili men jazak-allah

ki maara to hamen tu ne par ik eazaz se maara

na udta murgh-e-dil to changul-e-shahin men kyuun phansta

gaya ye khasta apni khubi-e-parvaz se maara

jahan tak saz-dari hai likhi dushman ke taale men

hamen badnam kar ke tale-e-na-saz se maara

hazaron rang us ke khuun ne yaron ko dikhlae

jab us ne ‘mushafi’ ko apni tegh-e-naz se maara

Leave a Comment