khula hai ziist ka ik ḳhushnuma varaq phir se
hava-e-shauq ne ki hai yahan pe daq phir se
pukarta hai mujhe kaun mere maazi se
ki aaj ruḳh pe mire chha ga.i shafaq phir se
ḳhafa ḳhafa se hain aḳhir janab-e-naseh kyuun
kisi ne kar diya kya aaj zikr-e-haq phir se
kisi se ruuTh ga.e ya kisi ka dil toḌa
jabin pe aa gaya kyuun aap ki araq phir se
miyan-e-dil koi leti hai Tiis angḌa.i
vahi hai ranj vahi gham vahi qalaq phir se
na niklo chandni raton men kitni baar kaha
hua hai chand ke chehre ka rang faq phir se
bas ek tajraba kaafi hai zindagi ke liye
paḌha na ja.ega ham se vahi sabaq phir se
yahi nizam-e-zamana yahi taghayyur hai
jo sahl hai vahi ho ja.ega adaq phir se
kahin qarib hi badal baraste hain ‘alok’
hava.en laa.i hain ḳhunki ki kuchh ramaq phir se
Leave a Reply