Haidar Ali Aatish
dahan par hain un ke guman kaise kaise
kalam aate hain darmiyan kaise kaise
zamin-e-chaman gul khilati hai kya kya
badalta hai rang asman kaise kaise
tumhare shahidon men dakhil hue hain
gul-o-lala-o-arghavan kaise kaise
bahar aai hai nashshe men jhumte hain
muridan-e-pir-e-mughan kaise kaise
ajab kya chhuta ruuh se jama-e-tan
lute raah men karvan kaise kaise
tap-e-hijr ki kahishon ne kiye hain
juda post se ustukhan kaise kaise
na mud kar bhi be-dard qatil ne dekha
tadapte rahe nim-jan kaise kaise
na gor-e-sikandar na hai qabr-e-dara
mite namiyon ke nishan kaise kaise
bahar-e-gulistan ki hai aamad aamad
khushi phirte hain baghban kaise kaise
tavajjoh ne teri hamare masiha
tavana kiye na-tavan kaise kaise
dil-o-dida-e-ahl-e-alam men ghar hai
tumhare liye hain makan kaise kaise
gham-o-ghussa o ranj-o-andoh-o-hirman
hamare bhi hain mehrban kaise kaise
tire cilk-e-qudarat ke qurban ankhen
dikhae hain khush-ru javan kaise kaise
kare jis qadar shukr-e-neamat vo kam hai
maze lutti hai zaban kaise kaise
Leave a Reply