Ghulam Husain Sajid
ek ghar apne liye tayyar karna hai mujhe
aur ik basti ko bhi mismar karna hai mujhe
is andhere men chhupana hai koi dushman magar
is ujale men kisi par vaar karna hai mujhe
ek naddi ke kinare par Thaharne ke liye
shaam hone tak ye dariya paar karna hai mujhe
DhunD laaya huun ḳhushi ki chhanv jis ke vaste
ek gham se bhi use do-char karna hai mujhe
bhandhni hai aḳhiri ik chaal se saari bisat
aur us ka daav bhi be-kar karna hai mujhe
kis samundar men utarna hai paḌav ke liye
kis nagar ko ab gale ka haar karna hai mujhe
ek ḳhvahish hai jo shayad umr bhar puuri na ho
ek sapne se hamesha pyaar karna hai mujhe
ek jhonke ko ravan rakhna hai sehn-e-bagh men
ek gul ko shamil-e-guftar karna hai mujhe
ek an-jani sada ki khoj men chalte hue
ek mub.ham rabt ko divar karna hai mujhe
Leave a Reply