mere armanon ko pamal-e-ziyan rahne bhi de
shauq-e-manzil ko sharik-e-karvan rahne bhi de
va.ada-o-paiman-e-ulfat ko na de lafzon ka rang
dard se labrez nalon ko javan rahne bhi de
dekh mujh ko hasrat-aluda nigahon se na dekh
ye fusun ye shoḳh andaz-e-bayan rahne bhi de
ha.il-e-ulfat agar hai zindagi ki kashmakash
zindagi ki kashmakash ko darmiyan rahne bhi de
main jahan huun jis tarah huun ḳhuub huun dil-shad huun
hasil-e-ulfat hain ye barbadiyan rahne bhi de
vo guzishta aish-o-ishrat vo nashat-e-zindagi
ḳhvab tha is ḳhvab ki ranginiyan rahne bhi de
dost majbur-e-vafa ho kar na kha dil ka fareb
zindagi par kamrani ka guman rahne bhi de
naqsh-e-gham ko kyon miTati hai dil-e-ghamgin se
ye miri ḳhunin baharen be-ḳhizan rahne bhi de
Leave a Reply