yahan se charon taraf raste nikalte hain
Thahar Thahar ke ham is ḳhvab se nikalte hain
kisi kisi ko hai tahzib-e-dasht-ara.i
ka.i to ḳhaak uḌate hue nikalte hain
yahan rivaj hai zinda jala diye jaa.en
vo log jin ke gharon se diye nikalte hain
ajiib dasht hai dil bhi jahan se jaate hue
vo ḳhush hain jaise kisi baagh se nikalte hain
ye log so rahe honge jabhi to aaj talak
zaruf-e-ḳhak se ḳhvabon bhare nikalte hain
sitare dekh ke ḳhush huun ki roz meri tarah
jo kho ga.e hain unhen DhunDne nikalte hain
Leave a Reply