mujhe hansne ki aadat thi magar vo aur kuchh samjha
zara si ik shararat thi magar vo aur kuchh samjha
miri har baat par hansne se aksar vo ulajhta tha
mujhe us se mohabbat thi magar vo aur kuchh samjha
main hansti thi ki ranj-o-gham mira zahir na ho us par
muqaddar men jo zulmat thi magar vo aur kuchh samjha
main sun kar taal jaati thi nasihat ki sabhi baten
miri dil se baghavat thi magar vo aur kuchh samjha
sunana hal-e-dil chaha magar us ko bhi jaldi thi
badi achchhi hikayat thi magar vo aur kuchh samjha
manana chahti thi sachche dil se ai ‘dua’ us ko
use mujh se shikayat thi magar vo aur kuchh samjha
Leave a Reply