Najeeb Ahmad
ik vahm ki surat sar-e-divar-e-yaqin hain
dekho to hain maujud na dekho to nahin hain
ham se kashish-e-mauja-e-raftar na puchho
ham ahl-e-mohabbat to giraftar-e-zamin hain
is raah se haT kar guzar ai naqa-e-laila
is gosha-e-sahra men ham aram-guzin hain
chhoḌen bhi to kis tarah ham is shahr ko chhoḌen
is najd ke paband tire ḳhak-nashin hain
is da.era-e-raushni-o-rang se aage
kya janiye kis haal men basti ke makin hain
vo tab bhi gurezan the magar dushman-e-dil the
vo ab bhi gurezan hain magar dushman-e-din hain
har marhal-e-bud tha nabud ki manzil
lekin tire hote hamen lagta tha hamin hain
kis taur sameTen tiri palkon ke sitare
kahne ko to sha.er hain magar apne ta.iin hain
Leave a Reply