Anwar Shuoor
main ḳhaak huun aab huun hava huun
aur aag ki tarah jal raha huun
tah-ḳhana-e-zehn men na jaane
kya shai hai jise TaTolta huun
bahrup nahin bhara hai main ne
jaisa bhi huun samne khaḌa huun
sunta to sabhi ki huun magar main
karta huun vahi jo chahta huun
achchhon ko to sab hi chahte hain
hai koi ki main bahut bura huun
paata huun use bhi apni janib
muḌ kar jo kisi ko dekhta huun
bachna hai muhal is maraz men
jiine ke maraz men mubtala huun
sunta hi na ho koi to kyuun main
chilla.un fughan karun karahun
auron se to ijtinab tha hi
ab apne vajud se ḳhafa huun
baaqi hain jo chand roz vo bhi
taqdir ke naam likh raha huun
likhta huun har ek baat sun kar
ye baat to main bhi kah chuka huun
Leave a Reply