phaile hue hain shahr men saae nidhal se
jaaen kahan nikal ke khayalon ke jaal se
mashriq se mera rasta maghrib ki samt tha
us ka safar junub ki janib shumal se
kaisa bhi talkh zikr ho kaisi bhi tursh baat
un ki samajh men aaegi gul ki misal se
chup-chap baithe rahte hain kuchh bolte nahin
bachche bigad gae hain bahut dekh-bhal se
rangon ko bahte dekhiye kamre ke farsh par
kirnon ke vaar rokiye shishe ki dhaal se
ankhon men ansuon ka kahin naam tak nahin
ab juute saaf kijiye un ke rumal se
chehra bujha bujha sa pareshan zulf zulf
allah dushmanon ko bachae vabal se
phir paniyon men nuqrai saae utar gae
phir raat jagmaga uthi chandi ke thaal se