ham us se ishq ka iz.har kar ke dekhte hain
kiya hai jurm to iqrar kar ke dekhte hain
hai ishq jang to phir jiit len chalo ham log
hai dariya aag ka to paar kar ke dekhte hain
hai kohsar to nahren nikal den is se
hai regzar to gulzar kar ke dekhte hain
ham us ko dekhna chahen to kis tarah dekhen
so us ki yaad ko kirdar kar ke dekhte hain
vo hosh-mand agar hai to kar den divana
vo be-ḳhabar hai to hushiyar kar ke dekhte hain
hamare sar pe to aati nahin koi dastar
so apne sar ko hi dastar kar ke dekhte hain
Leave a Reply