dilon se tark-e-ta.alluq ka Dar nikal jaa.e
tira mizaj zara sa agar badal jaa.e
sabhi ke samne hai ik hujum rishton ka
vo kamran hai jo is bhiiḌ se nikal jaa.e
is irtikab-e-tamanna pe kya saza doge
tumhare qadmon pe koi agar machal jaa.e
mire salam ka rasman bhi dijiye na javab
miri taraf se kabhi zehn agar badal jaa.e
siva.e ik tire chehre ke bhuul kar main ne
agar nigah uTha.i ho aankh jal jaa.e
Leave a Reply