Dinesh Kumar Drouna
shikayat kis se hai kis baat ki hai
kami koi nahin kya ye kami hai
nazar-andaz kar ke ye mila hai
ki ab us ko mohabbat ho rahi hai
main ik dariya ka pyasa tha magar ab
usi dariya ko meri tishnagi hai
safar men niind men daftar men ghar men
kisi ki har jagah maujudgi hai
mira gham Dhak liya hai qahqahon ne
ujalon men ghazab ki tirgi hai
ḳhuda hone nahin deta hai mujh ko
mire andar ka vo jo aadmi hai
mohabbat ho ki ho nafrat kisi se
jagah dil men barabar gherti hai
Leave a Reply