Bismil Azimabadi
meri dua ki ghair pe un ki nazar na ho
vo haath uTha rahe hain ki yarab asar na ho
ham ko bhi zid yahi hai ki teri sahar na ho
ai shab tujhe ḳhuda ki qasam muḳhtasar na ho
tum ik taraf tumhari ḳhuda.i hai ik taraf
hairat-zada hai dil ki kidhar ho kidhar na ho
dushvar-tar bhi sahl hai himmat ke samne
ye ho to koi aisi muhim hai ki sar na ho
jab vo na aa.e fatiha paḌhne to ai saba
baaz aa gaya main sham.a bhi ab nauhagar na ho
ye kah ke deti jaati hai taskin shab-e-firaq
vo kaun si hai raat ki jis ki sahar na ho
‘bismil’ buton ka ishq mubarak tumhen magar
itne niDar na ho ki ḳhuda ka bhi Dar na ho
Leave a Reply