Quaiser Khalid
ham zamin ka atishin ubhar dekhte rahe
sahme sahme se hi bas ghubar dekhte rahe
shohraten, ye daulaten, ye masnaden, milin pa ham
be-niyaz hi rahe, hazar dekhte rahe
aḳhirash zamana un ko chhoḌ aage baḌh gaya
har qadam jo izzat-o-vaqar dekhte rahe
un ko phir amaan kahan nasib honi thii, ki jo
har maqam se rah-e-farar dekhte rahe
ek ek kar ke qatl ho rahi thi phir bhi ham
apni ḳhvahishon ki ik qatar dekhte rahe
hai muhafiz-e-chaman ka mujrimana taur ye
nuch ga.i kali kali pa ḳhaar dekhte rahe
sab siyah tha kahin na sab safed, phir bhi ham
lail dekhte rahe, nahar dekhte rahe
bahar apne ḳhol se na aa sake tamam umr
ham darun-e-zat ḳhalfashar dekhte rahe
hausla na kavishen, amal na rabt-e-asman
ham ki hasraton ka ik mazar dekhte rahe
aftab o kahkashan, ye chand, taare duur se
raushni ka bil-yaqin madar dekhte rahe
ab gila hai kyuun madad ka asman se, jab ki ham
kayar aise the ki ḳhud pe vaar dekhte rahe
tere bin hayat ki soch bhi gunah thi
ham qarib-e-jan tira hisar dekhte rahe
dusron ke haq ki vo laḌa.i laḌ sakenge kya
vo jo apne aap ko bhi ḳhvar dekhte rahe
‘ḳhalid’ aise bhi to hain kinare baiTh kar hi jo
bahar men chaḌhav aur utaar dekhte rahe
Leave a Reply