Shaz Tamkanat
azab-e-hijr bhi hai rahat-e-visal ke saath
mili to hain mujhe ḳhushiyan magar malal ke saath
tumhari yaad men bhi zabt-o-etidal kahan
main tum se kaise milun zabt-o-etidal ke saath
yahi bahut hai zamane men char-din ke liye
agar hayat kaTe ek ham-ḳhayal ke saath
kuchh is tarah shab-e-mah ne kiran ki dastak di
ubhar ga.iin ka.i choTen kisi ḳhayal ke saath
ufuq nahin to kisi chand ka tasavvur kya
sitare Duub ga.e dard ke zaval ke saath
shafaq gulal kali chandni alaap sahar
nazar ke samne aa.e tiri misal ke saath
bhaTak raha huun ki farda ka rasta gum hai
qadam qadam mira maazi hai mere haal ke saath
use sunun ki use dekhta rahun ai ‘shaz’
jamal-e-naghma bhi hai naghma-e-jamal ke saath
Leave a Reply