ab sarab ke chashme maujzan nahin hote
ḳhushk ho ga.e shayad tishnagi ke sab sote
niind men bhi chadar ka itna paas hai tum ko
kuchh to paanv phailao is tarah nahin sote
kaisi raat aa.i hai niind uḌ ga.i sab ki
manzilen thapakti hain qafile nahin sote
ḳhvab ḳhud haqiqat hain aankh khol kar dekho
kis ne kah diya tum se ḳhvab sach nahin hote
chaak ho gaya daman haath ho ga.e zaḳhmi
ek dagh-e-rusva.i aur kis tarah dhote
girya-o-tabassum to hain naqab chehron ke
aa.ine nahin hanste aa.ine nahin rote
Leave a Reply