Kishwar Naheed
ai rah-e-hijr-e-nau-faroz dekh ki ham thahar gae
ye bhi nahin ki zinda hain ye bhi nahin ki mar gae
khvab talak rihai thi tere firaq-o-hijr se
aankh khuli to aaine tah men kahin utar gae
tu bhi miri tarah raha dhyan uthae shahr ka
soe to chhanv so gai qafile kuuch kar gae
tujh ko bahut qarib se dekh ke yuun laga ki ab
khema-e-jan ukhad gaya dasht-e-talab guzar gae
dil ki gavahi ke liye rasm-e-dua buri na thi
ranj-e-khumar-e-be-samar dhundne us ke ghar gae
ham hi the vo bala-kashan dar-o-rasan the jin ki jaan
ham hi the shab ke ham-safar ham hi na apne ghar gae
dil ko tire firaq ki aarzu yaad rah gai
din vo mohabbaton ke bhi misl-e-rah-e-safar gae
mere liye bhi khvab the us ne rakhe hue kahin
shahr men un ko dhundne qasid-e-be-hunar gae
Leave a Reply