abbas-tabish

Shayad Kisi Bala Ka Tha Saya Darakht Par

shayad kisi bala ka tha saaya darakht par

chidiyon ne raat shor machaya darakht par

mausam tumhare saath ka jaane kidhar gaya

tum aae aur bor na aaya darakht par

dekha na jaae dhuup men jalta hua koi

mera jo bas chale karun saaya darakht par

sab chhode ja rahe the safar ki nishaniyan

main ne bhi ek naqsh banaya darakht par

ab ke bahar aai hai shayad ghalat jagah

jo zakhm dil pe aana tha aaya darakht par

ham donon apne apne gharon men muqim hain

padta nahin darakht ka saaya darakht par

More Poems

Leave a Comment