Poet
un ankhon se pahle bhi kahin baat hui hai
sochunga kahan tum se mulaqat hui hai
taqdis-e-mohabbat pe kahin harf na aa.e
taskin-e-havas shamil-e-jazbat hui hai
ye raushni sha.ista ujalon ka hai dhoka
ai dost abhi ḳhatm kahan raat hui hai
halat hi aise hain ki thamte nahin aansu
ab zindagi be-vaqt ki barsat hui hai
jis roz se ham shahr-e-tamanna men luTe hain
afsurdagi ham-shakl-e-munajat hui hai
tum bhi to ‘ra.is’ aaj na.e zehn se socho
ab tak to ghazal nazr-e-rivayat hui hai
Leave a Reply