Poet
main ji raha huun tera sahara liye baghair
ye zahr pi raha huun gavara kiye baghair
bikta na kaash ishq ki qimat liye baghair
main un ka ho gaya unhen apna kiye baghair
vaqif to huun vafa ke natije se ham-nashin
banti nahin hai un pe bharosa kiye baghair
kya zindagi hai ahl-e-gulistan ki zindagi
gul hans rahe hain chak-e-gareban siye baghair
din-rat ham ne gham ki hifazat to ki magar
duniya na rah saki hamen rusva kiye baghair
marne ki aarzu mujhe muddat se hai magar
lekin ye kaam ho nahin sakta jiye baghair
un ki nigah-e-mast ke sadqe men muddaton
ik be-ḳhudi ka daur raha hai piye baghair
barq-e-chaman hudud-e-chaman se nikal ke dekh
tarik ek aur bhi ghar hai diye baghair
ai ‘raaj raas aa na saki mahfil-e-hayat
ham aa ga.e the kis ki ijazat liye baghair
Leave a Reply