guzrenge tere daur se jo kuchh bhi haal ho
ḳhud kaun chahta hai ki jiina muhal ho
main ne tamam-umr guzari hai dil ke saath
laao mire huzur jo amr-e-muhal ho
ye soch kar fareb-e-mohabbat men aa ga.e
ham itne ḳhush kahan jo natija malal ho
main jaise ajnabi koi apne dayar men
tum jaise mere zehn men koi saval ho
dil ke muamalat hi yaaro ajiib hain
apni ḳhabar nahin hai to kis ka ḳhayal ho
ham ehtiyat-e-dida-o-dil se guzar chuke
aa jaa.e samne jo ḳhuda-e-jamal ho
soz-e-gham-e-hayat se ‘anjum’ gurez kar
loha nahin hai dil jo tapane se laal ho
Leave a Reply