ham ne khulne na diya be-sar-o-samani ko
kahan le jaaen magar shahr ki virani ko
sirf guftar se zakhmon ka rafu chahte hain
ye siyasat hai to phir kya kahin nadani ko
koi taqsim nai kar ke chala jaata hai
jo bhi aata hai mire ghar ki nigahbani ko
ab kahan jaun ki ghar men bhi huun dushman apna
aur bahar mira dushman hai nigahbani ko
be-hisi vo hai ki karta nahin insan mahsus
apni hi ruuh men aai hui tughyani ko
aaj bhi us ko faraz aaj bhi aali hai vahi
vahi sajda jo kare vaqt ki sultani ko
aaj yusuf pe agar vaqt ye laae ho to kya
kal tumhin takht bhi doge isi zindani ko
subh khalne ki ho ya shaam bikhar jaane ki
ham ne khushbu hi kiya apni pareshani ko
vo bhi har-an naya meri mohabbat bhi nai
jalva-e-husn kashish hai miri hairani ko
kuza-e-harf men laaya huun tumhari khatir
ruuh par utre hue ek ajab paani ko
Leave a Reply