bisat-e-vaqt pe sadiyon ke fasle ham log
kanar-e-sham-o-sahar men kahan Dhale ham log
na karvan na musafir magar jaras na thami
na raushni na hararat magar jale ham log
maqam jin ka muarriḳh ke hafize men nahin
shikast o fat.h ke mabain marhale ham log
numud-e-jism ki shorida ḳhvahishen duniya
fishar-e-ruh ke nadida valvale ham log
na jaane kab koi karvaT hamen jaga Daale
zamin ke batn men ḳhvabida zalzale ham log
fasad-e-koh-kani hila-ha-e-parvezi
hazar rang ke kanTon men aable ham log
amir-e-shahr ki moTi samajh men kya aate
zamir-e-dahr ke nazuk muamle ham log
hujum-e-sang-e-aziyyat men sar jhuka.e hue
ravan hain le ke mashiyyat ke qafile ham log
zaban-burida o be-dast-o-pa sahi lekin
zamir-e-kaun-o-makan hain bure bhale ham log
Leave a Reply