aghaz-e-gul hai shauq magar tez abhi se hai
ya.ani hava-e-bagh junun-ḳhez abhi se hai
josh-e-talab hi maujib-e-darmandagi na ho
manzil hai duur aur qadam tez abhi se hai
kya irtibat-e-husn-o-mohabbat ki ho umiid
vo jan-e-shauq ham se kam-amez abhi se hai
tartib-e-karvan men bahut der hai magar
avaza-e-jaras hai ki mahmez abhi se hai
pahli hi zarb-e-tesha se koh-e-giran hai chuur
hasrat-ma.al satvat-e-parvez abhi se hai
kya jaane mai-kashon ka ho kya hashr sub.h tak
saaqi ki har nigah dil-avez abhi se hai
ye ibtida-e-shauq ye pur-shauq dil mira!
ik jam-e-atishin hai ki labrez abhi se hai
‘tabish’ bhari bahar men koi bichhaḌ gaya
ab ke chaman men bu-e-ḳhizan tez abhi se hai
Leave a Reply