Sajjad Baqar Rizvi
tujhe main milun to kahan milun mira tujh se rabt muhal hai
tiri bazm bazm-e-nashat hai miri bazm bazm-e-ḳhayal hai
tira dil nahin tire haath men mujhe dekh main huun girafta-dil
mira jabr meri najat hai ye mire hunar ka kamal hai
na tu ham-zaban na tu ham-zaman mira tujh se kaisa mo.amla
mira ahd ahd-e-kamal-e-gham tira ahd ahd-e-zaval hai
main huun kam-talab tu hai kam-nazar main nava-e-dil tu hava-e-dil
miri dastaras men hain kul zaman tu asir-e-lamha-e-hal hai
vo hai naqd-e-zar tiri aarzu ye hai naqd-e-dil miri aarzu
tira naqd rizq-e-haram hai mira naqd rizq-e-halal hai
tiri justuju miri gumrahi tiri intiha miri ibtida
tiri ziist tera javab hai miri ziist mera saval hai
tujhe karobar ko din mila mujhe kahish-e-shab-e-gham mili
mujhe ḳhvahish-e-gham-e-agahi tujhe ḳhvahish-e-zar-o-mal hai
mujhe sun tarana-e-dard men mujhe dekh chehra-e-zard men
mujhe DhunD gham ki panah men ki vo mera shamil-e-hal hai
main huun ‘baqar’ aise maqam par nahin kam-nazar ka jahan guzar
ye ajiib manzil-e-shauq hai ki na hijr hai na visal hai
Leave a Reply