Main Agar Wo Hun Jo Hona Chahiye

main agar vo huun jo hona chahiye

main hi main huun phir mujhe kya chahiye

gharq-e-khum hona mayassar ho to bas

chahiye saghar na miina chahiye

munhasir marne pe hai fatah-o-shikast

khel mardana hai khela chahiye

be-takalluf phir to kheva paar hai

maujzan qatra men dariya chahiye

tez ghairon par na kar tegh-o-tabar

aap apne se mubarra chahiye

ho dam-e-arz-e-tajalli paash paash

siina misl-e-tur-e-sina chahiye

husn ki kya ibtida kya intiha

shefta bhi be-sar-o-pa chahiye

parsa ban gar nahin rindon men baar

kuchh to bekari men karna chahiye

kufr hai saaqi pe khissat ka guman

tishna sargarm-e-taqaza chahiye

Leave a Comment