Poet
gulshan men koi chak-e-gareban bhi nahin hai
aur fasl-e-bahar aane ka imkan bhi nahin hai
ham naqd-e-dil-o-jan bhi luTa aa.e sar-e-bazm
aur aap pe is ka koi ehsan bhi nahin hai
kis munh se kare tere taghaful ki shikayat
jis par karam-e-gardish-e-dauran bhi nahin hai
puchhe jo koi haal to kya haal bata.e
vo shaḳhs jo kuchh din se pareshan bhi nahin hai
vo dard mayassar hai to kya chahiye ‘nashtar’
vo dard ki jis ka koi darman bhi nahin hai
Leave a Reply