Ismail Merathi
vahin se jab ki ishara ho khud-numai ka
ajab ki banda na daava kare khudai ka
mile jo rutba tire dar ki jabah-sai ka
to ek silsila ho shahi-o-gadai ka
nahin hai faiz men khissat va-lek paida hai
tafavut aina-o-sang men safai ka
yahan jo ishq hai betab-e-jalva-e-didar
vahan bhi husn muharrik hai khud-numai ka
buton ke samne but-gar ghise jabin-e-niyaz
main shefta huun tiri shan-e-kibriyai ka
na kar kisi ki burai na ban bhale se bura
bhala bhala hai bura kaam hai burai ka
banaen bigdi hui ko to ek baat bhi hai
bigadna nahin mushkil bani-banai ka
utha hijab to bas din-o-dil diye hi bani
janab-e-shaikh ko daava tha parsai ka
tumhare dil se kudurat mitae to janen
khula hai shahr men ik mahkama safai ka
havas hai gar sar-o-saman ke jama karne ki
talash kar sar-o-saman be-navai ka
sivae ishq nahin koi rahbar-e-chalak
vahan khirad ko nahin hausla rasai ka
usi ka vasf hai maqsud sher-khvani se
usi ka zikr hai mansha ghazal-sarai ka
nahin hai ab ke zamane ki ye ravish zinhar
main yadgar huun ‘khaqani’-o-‘sanai’ ka
Leave a Reply