Rifaqat Mein Rafiqon Ki Riya-Kari Bhi Shamil Hai

Rahat Hasan

rifaqat men rafiqon ki riya-kari bhi shamil hai

miri asaniyon men kar-e-dushvari bhi shamil hai

ba-juz tasvir-e-gul ke baagh men dekhun to kya dekhun

aqidat ke asar men ḳhud se be-zari bhi shamil hai

naqahat ka hai ghalba so jhuka dete hain sar apna

ita.at ke amal men apni lachari bhi shamil hai

musalsal band ankhon se manazir dekhta huun main

ḳhayal-o-ḳhvab men ehsas-e-bedari bhi shamil hai

ayaan hote hain ab mujh par kamal-o-fan ke sab jalve

gham-e-ḳhashak men lagta hai chingari bhi shamil hai

kabhi vo ḳhuun bahata hai kabhi aansu bahata hai

adavat ki ada men tarz-e-gham-ḳhvari bhi shamil hai

samajhne sochne se hi nahin milti mujhe fursat

miri masrufiyat men shaghl-e-be-kari bhi shamil hai

gadaon ko taraste hain sabhi jah-o-hasham vaale

amiri ki ata men lutf-e-nadari bhi shamil hai

na jiita hai na marta hai ajab insan hai ‘rahat’

na.i bimariyon men ab ye bimari bhi shamil hai