Kisht-E-Dil Viran Sahi tuKHm-E-Hawas Boya Nahin

kisht-e-dil vīrāñ sahī tuḳhm-e-havas boyā nahīñ

ḳhvāhishoñ kā bojh maiñ ne aaj tak Dhoyā nahīñ

us kī ā.ankhoñ meñ bichhā hai surḳh tahrīroñ kā jaal

aisā lagtā hai ki ik muddat se vo soyā nahīñ

ḳhvāb kī anjān khiḌkī meñ nazar aayā thā jo

zehn ne us chehra-e-mānūs ko khoyā nahīñ

ek muddat par mile bhī to na milne kī tarah

is tarah ḳhāmosh ho muñh meñ zabāñ goyā nahīñ

maiñ ne apnī ḳhvāhishoñ kā qatl ḳhud hī kar diyā

haath ḳhūn-ālūd haiñ in ko abhī dhoyā nahīñ

dekh kar hoñToñ pe mere muskurāhaT kī lakīr

vo samajhte haiñ ki ‘aslam’ maiñ kabhī royā nahīñ

Leave a Comment