gada-e-shahr-e-a.inda tahi-kasa milega
tajavuz aur tanha.i ki had par kya milega
siyahi pherti jaati hain raten bahr o bar pe
inhi tarikiyon se mujh ko bhi hissa milega
main apni pyaas ke hamrah mashkiza uTha.e
ki in sairab logon men koi pyasa milega
rivayat hai ki aba.i makanon par sitara
bahut raushan magar namnak o afsurda milega
shajar hain aur is miTTi se paivasta rahenge
jo ham men se nahin asa.ishon se ja milega
rida-e-reshmi oḌhe hue guzregi mish.al
nashist-e-sang pe har sub.h gul-dasta milega
vo a.ina jise ujlat men chhoḌ aa.e the sathi
na jaane bad-o-ḳhak-asar men kaisa milega
use bhi yaad rakhna bad-bani sa.aton men
vo sayyara kanar-e-sub.h-e-farda aa milega
chara-gahon men ruk kar asmani ghanTiyon ko
suno kuchh der ki vo zamzama-paira milega
usi ki vadiyon men ta.iran-e-rizq-ju ko
nasheman aur ujli niind ka dariya milega
usi ja-e-namaz o raaz pe ik roz ‘sarvat’
achanak dar khulega aur vo jhonka milega
Leave a Reply