Ajmal Siraj
kisi ke hijr men jiina muhal ho gaya hai
kise bataen hamara jo haal ho gaya hai
kahin gira hai na raunda gaya hai dil phir bhi
shikasta ho gaya hai paemal ho gaya hai
sahar jo aai hai shab ke tamam hone par
to is men kaun sa aisa kamal ho gaya hai
koi bhi chiiz salamat nahin magar ye dil
shikastagi men jo apni misal ho gaya hai
udhar charagh jale hain kisi dariche men
idhar vazifa-e-dil bahal ho gaya hai
haya ka rang jo aaya hai us ke chehre par
ye rang hasil-e-sham-e-visal ho gaya hai
masafat-e-shab-e-hijran men chand bhi ‘ajmal’
thakan se chuur ghamon se nidhal ho gaya hai
Leave a Reply