dhuup men jaise kuhasa ik tasavvur aap ka
hai hasin jhonka hava ka ik tasavvur aap ka
zehn men aa kar kahin se gudgudane lag gaya
dekh kar mujh ko ruvansa ik tasavvur aap ka
siḌhiyan kitni bhi chaḌh luun bhuul jaane ki bhale
saanp hai ninanve ka ik tasavvur aap ka
ye nahin ho to ḳhalish hai aur ho to bhi ḳhalish
dard hai lekin dava sa ik tasavvur aap ka
rat-din pichhe lag rahta hai saaya sa mire
be-tahasha bad-havasa ik tasavvur aap ka
go haqiqat ḳhvahishon par munh chiḌati hai magar
hai haqiqat par tamacha ik tasavvur aap ka
Leave a Reply