Tauseef Tabassum
dil ki baat na maani hoti ishq kiya kyuun piiri men
apni marzi bhi shamil hai apni be-tauqiri men
dard uTha to reza dil ka gosha-e-lab par aan jama
ḳhush hain koi naqsh to ubhra baare be-tasviri men
qaid men gul jo yaad aaya to phuul sa daman chaak kiya
aur lahu phir ro.e goya bhule nahin asiri men
jaane vaale chale ga.e par lamha lamha un ki yaad
dukh-mele men ungli thame saath chali dil-giri men
tauq gale ka paanv ki beḌi ahan-gar ne kaaT diye
apne aap se bahar nikle zor kahan zanjiri men
shukr hai jitni umr guzari nan-o-namak ki fikr na thi
haath ka takiya ḳhaak ka bistar hasil rahe faqiri men
Leave a Reply