Is Dil Ko Tah-E-Tegh Sula Kyon Nahin Dete

Sewak Nayyar

is dil ko tah-e-tegh sula kyon nahin dete

har roz ka jhagḌa hai miTa kyon nahin dete

chehre se naqab aap uTha kyon nahin dete

halki si jhalak ek dikha kyon nahin dete

hairan huun ki ye shoḳh-o-hasin mah-jabin log

badle men vafaon ke vafa kyon nahin dete

rahzan ho to phir saath chale aate ho kyunkar

rahbar ho to manzil ka pata kyon nahin dete

gham aur bhi dil ka jo shab-e-hijr baḌha.e

is sham-e-fasurda ko bujha kyon nahin dete

is dil ki tabahi pe pasheman ho agar tum

is ḳhana-viran ko basa kyon nahin dete

vo baat ki jo tark-e-ta.alluq ka sabab hai

vo baat hamen aap bata kyon nahin dete

betab mohabbat men ho gar itne hi ‘nayyar’

afsana-e-dil un ko suna kyon nahin dete