Baqi Ahmad Puri
teri tarah malal mujhe bhi nahin raha
ja ab tira ḳhayal mujhe bhi nahin raha
tu ne bhi mausamon ki pazira.i chhoḌ di
ab shauq-e-mah-o-sal mujhe bhi nahin raha
mera javab kya tha tujhe bhi ḳhabar nahin
yaad ab tira saval mujhe bhi nahin raha
jis baat ka ḳhayal na tu ne kabhi kiya
is baat ka ḳhayal mujhe bhi nahin raha
toḌa hai tu ne jab se mire dil ka aa.ina
andaza-e-jamal mujhe bhi nahin raha
‘baqi’ men apne fan se baḌa pur-ḳhulus huun
is vaste zaval mujhe bhi nahin raha
Leave a Reply