aur koi baat sar-e-bazm-e-suḳhan kab nikli
bas tiri baat hi nikli hai yahan jab nikli
aankh men gham ka dhuan lab pe tabassum ki kiran
us ke chehre ki udasi bhi mohazzab nikli
kya ajab rasm-e-adalat hai ki har jurm ke ba.ad
mere a.amal men nikli hai ḳhata jab nikli
sun ke suraj ki shahadat ki ḳhabar kirnon se
oḌh kar kaali rida shaam ga.e shab nikli
sirf socha tha ki ik roz bichhaḌna hoga
tham ga.i nabz laga jism se jaan ab nikli
Leave a Reply