Fikr-E-Manzil Hai Na Hosh-E-Jada-E-Manzil Mujhe

fikr-e-manzil hai na hosh-e-jada-e-manzil mujhe

ja raha huun jis taraf le ja raha hai dil mujhe

ab zaban bhi de ada-e-shukr ke qabil mujhe

dard bakhsha hai agar tu ne bajae-dil mujhe

yuun tadap kar dil ne tadpaya sar-e-mahfil mujhe

us ko qatil kahne vaale kah uthe qatil mujhe

ab kidhar ja.un bata ai jazba-e-kamil mujhe

har taraf se aaj aati hai sada-e-dil mujhe

rok sakti ho to badh kar rok le manzil mujhe

har taraf se aaj aati hai sada-e-dil mujhe

jaan di ki hashr tak main huun miri tanhaiyan

haan mubarak fursat-e-nazzara-e-qatil mujhe

har ishare par hai phir bhi gardan-e-taslim kham

janta huun saaf dhoke de raha hai dil mujhe

ja bhi ai naseh kahan ka suud aur kaisa ziyan

ishq ne samjha diya hai ishq ka hasil mujhe

main azal se subh-e-mahshar tak farozan hi raha

husn samjha tha charagh-e-kushta-e-mahfil mujhe

khun-e-dil rag rag men jam kar rah gaya is vahm se

badh ke siine se na lipta le mira qatil mujhe

kaisa qatra kaisa dariya kis ka tufan kis ki mauj

tu jo chahe to Dubo de khushki-e-sahil mujhe

phunk de ai ghairat-e-soz-e-mohabbat phunk de

ab samajhti hain vo nazren rahm ke qabil mujhe

tod kar baitha huun rah-e-shauq men pa-e-talab

dekhna hai jazba-e-be-tabi-e-manzil mujhe

ai hujum-e-na-umidi shad-bash-o-zinda-bash

tu ne sab se kar diya begana-o-ghafil mujhe

dard-e-mahrumi sahi ehsas-e-nakami sahi

us ne samjha to bahar-surat kisi qabil mujhe

ye bhi kya manzar hai badhte hain na rukte hain qadam

tak raha huun duur se manzil ko main manzil mujhe

Leave a Comment