Poet
bulbul sune na kyunki qafas men chaman ki baat
avara-e-vatan ko lage khush vatan ki baat
mat puchh haal apne tu bimar-e-ishq ka
hone lagi ab us ke to gor-o-kafan ki baat
hai mausam-e-bahar men ba-sad-zaban khamosh
ghunche ne kya suni thi kisi ke dahan ki baat
aish-o-tarab ka zikr karun kya main dosto
mujh gham-zada se puchhiye ranj-o-mehan ki baat
naseh main kya kahun ki hua kis tarah se chaak
dast-e-junun se puchho mire pairahan ki baat
tha aqil-e-zamana pa divana ho gaya
jis shakhs ne suni mire divana-pan ki baat
sar diije rah-e-ishq men par munh na modiye
patthar ki si lakir hai ye kohkan ki baat
bazm-e-chaman bhi us se khajil hai bahar men
kya puchhne hai yaar tiri anjuman ki baat
yaaro main kya kahun ki jala kis tarah patang
puchho zaban-e-shama se us ki lagan ki baat
shayad usi ka zikr ho har rahguzar men main
sunta huun gosh-e-dil se har ik mard-o-zan ki baat
vo shai nahin hai ham men ki jis se mile vo yaar
aati hai yuun to ham ko bhi har ek fan ki baat
‘jurat’ khizan ke aate chaman men raha na kuchh
ik rah gai zaban pe gul-o-yasman ki baat
Leave a Reply