zamin ki kokh se pahle shajar nikalta hai
vo us ke ba.ad parindon ke par nikalta hai
shab-e-siyah men jugnu bhi ik ghanimat hai
zara sa hausla andar ka Dar nikalta hai
ki buḌhe peḌ ke tevar badalne lagte hain
kahin jo ghaas ka tinka bhi sar nikalta hai
phir us ke ba.ad hi deta hai kaam ki ujrat
hamare ḳhuun se pahle vo zar nikalta hai
vazifa tujh ko batata huun ek chahat ka
jo qasr-e-zat se nafrat ka shar nikalta hai
kahani likhta hai aise ki us ka har kirdar
nikalna koi na chahe magar nikalta hai
main aise shaḳhs se ‘arshad’ gurez kaise karun
fasil-e-dil men jo dastak se dar nikalta hai
Leave a Reply