Shaz Tamkanat
sanson men base ho tum ankhon men chhupa lunga
jab chahun tumhen dekhun a.ina bana lunga
yadon se kaho meri balin se chali jaa.en
ab ai shab-e-tanha.i aram zara lunga
ranjish se juda.i tak kya saneha guzra hai
kya kya mujhe da.ava tha jab chahun mana lunga
tasvir ḳhayali hai har aankh savali hai
duniya mujhe kya degi duniya se men kya lunga
kab lauT ke aaoge israr nahin karta
itna mire bas men hai main umr ghaTa lunga
kya tohmaten duniya ne ai ‘shaz’ uTha.i hain
ik tohmat-e-hasti thi socha tha uTha lunga
Leave a Reply