Asad Rizvi
kisi ki yaad men jaise azaab ki ḳhushbu
bikhar rahi hai varaq se kitab ki ḳhushbu
thake hue se musafir ka ḳhvab lagti hai
aziyyaton ke safar men gulab ki ḳhushbu
is ek ḳhat ne ka.i hadse suna Daale
gharon men phail ga.i iztirab ki ḳhushbu
na koi raqs na mahfil na koi jam-o-surur
bhaTak rahi hai mahal men navab ki ḳhushbu
tamam bhaunre libason ki tarah lipTe hain
badan se phulon ke phaili shabab ki ḳhushbu
simaT ke phail ga.i anso.on ke saath ‘asad’
hamare ḳhat men tumhare javab ki ḳhushbu
Leave a Reply