aap jab muskura.e ghazal ho ga.i
kuchh qarib aur aa.e ghazal ho ga.i
toḌ kar apne gulshan se taaza gulab
meri ḳhatir vo laa.e ghazal ho ga.i
lab pe fariyad to dil men sau iztirab
ashk ankhon men aa.e ghazal ho ga.i
vaa.e mahrumiyan haa.e majburiyan
dard-e-dil men daba.e ghazal ho ga.i
main ne puchha mohabbat unhen mujh se hai
chup rahe muskura.e ghazal ho ga.i
jab bhi angḌa.i tauba-shikan koi le
ek fitna uTha.e ghazal ho ga.i
dil men ‘ḳhushtar’ jo arman the so.e hue
ḳhub-ru ik jaga.e ghazal ho ga.i
Leave a Reply