nasir-kazmi

Dil Mein Ek Lahr Si Uthi Hai Abhi

dil men ik lahr si uthi hai abhi

koi taaza hava chali hai abhi

kuchh to nazuk mizaj hain ham bhi

aur ye chot bhi nai hai abhi

shor barpa hai khana-e-dil men

koi divar si giri hai abhi

bhari duniya men ji nahin lagta

jaane kis chiiz ki kami hai abhi

tu sharik-e-sukhan nahin hai to kya

ham-sukhan teri khamushi hai abhi

yaad ke be-nishan jaziron se

teri avaz aa rahi hai abhi

shahr ki be-charagh galiyon men

zindagi tujh ko DhunDti hai abhi

so gae log us haveli ke

ek khidki magar khuli hai abhi

tum to yaaro abhi se uth baithe

shahr men raat jagti hai abhi

vaqt achchha bhi aaega ‘nasir’

gham na kar zindagi padi hai abhi

More Poems

Leave a Comment