Rajesh Reddy
be-ghari ka apni ye iz.har kam kar dijiye
sher men zikr-e-dar-o-divar kam kar dijiye
apni tanha.i men itna bhi ḳhalal achchha nahin
aap apne aap se guftar kam kar dijiye
dushmanon ki ḳhud-ba-ḳhud ho ja.egi ta.adad kam
yaron ki fihrist men kuchh yaar kam kar dijiye
jab tavajjoh hi nahin maujudgi kis kaam ki
is kahani men mira kirdar kam kar dijiye
sochiye ab itne charagar kahan se a.enge
muskura kar apne kuchh bimar kam kar dijiye
aap ki baton men aa kar jaan se to ja chuke
ab to in men zahr ki miqdar kam kar dijiye
Leave a Reply