Sabir
va.ada tha kab ka bar-e-ḳhuda sochne to de
ma.aqul koi uzr naya sochne to de
parchi vo jis pe likkha hua hai pata tira
rakh kar kahan main bhuul gaya sochne to de
vo hijr bhi to gungi paheli se kam na tha
ab vasl aa paḌa hai zara sochne to de
ai chal-baz aise na itra ke muskura
chalne de chaal mujh ko zara sochne to de
hon iḳhtiyar se bhi pare kuchh tasarrufat
andesha-e-hisab haTa sochne to de
jo ho gaya main us pe huun raazi ḳhuda qasam
ye kyuun hua ye kaise hua sochne to de
Leave a Reply