aql ke jaal men phansi hi nahin
zindagi aaj tak khuli hi nahin
mujh men jiita raha sada koi
zindagi apni main ne ji hi nahin
saḳht itni ana ki thi divar
phir kisi bhi tarah giri hi nahin
main ne duniya sameT li to khula
kaam ki koi chiiz thi hi nahin
chand ke saath ho ga.i ruḳhsat
jaise vo is jahan ki thi hi nahin
jis se sairab ruuh ho jaati
aisi barish kabhi hui hi nahin
sainkaḌon zaḳhm hain zamane ke
dil men yadon ki ik ani hi nahin
qaid ankhon men hai bayaban bhi
gham ke kuuze men ik nadi hi nahin
Leave a Reply